Germaniyada yangi davr: Jurgen Klopp milliy terma jamoa bosh murabbiyi
Germaniya futboli navbatdagi keskin burilishni amalga oshirdi. Mamlakat milliy terma jamoasi boshqaruvi endi Jurgen Klopp qo‘lida. Uzoq yillik inqiroz, ketma-ket muvaffaqiyatsiz jahon chempionatlari, bosim ostidagi DFB – bularning barchasini endi sobiq Liverpool afsonasi tartibga solishi kerak.
Bu oddiy tayinlov emas. Bu – xavf bilan aralashgan katta umid.
Klopp: sharaf, mas’uliyat va ochiq ogohlantirish
“Bu yerda o‘tirish – katta sharaf”, dedi Klopp taqdimot chog‘ida. U milliy terma jamoa murabbiyligi qanchalik ulkan mas’uliyat ekanini bilganini, ammo lavozim bilan bevosita yuzlashgach, bu yuk yanada og‘irlashganini ta’kidladi.
U 2024-yilda charchoqni sabab qilib, Liverpooldan ketgandi. Oradan bir oz vaqt o‘tdi, endi esa u o‘zini “qayta zaryadlangan” deb his qilmoqda. Gap-so‘zlarda emas, ohangida ham shu sezildi.
Klopp juma kuni yana bir keskin bayonot berdi: agar ishlar yurishmasa, u hech qanday tovon puli talab qilmasdan ketishga tayyor. Yana bir chizig‘ini aniq chizdi – ommaviy axborot vositalari uning oilasini tinch qo‘ymasa, iste’fo bilan tahdid qildi.
59 yoshli mutaxassis bu avlodning eng sovrinli murabbiylaridan biri. U Germaniya bilan 2030-yilgacha shartnoma imzoladi – bu esa uni keyingi jahon chempionati sikliga ham bog‘lab qo‘yadi.
Red Bull bilan kelishuv: noodatiy kompensatsiya
Klopp 2025-yildan beri Avstriya energetik ichimlik giganti Red Bull tarkibida “Head of Global Soccer” sifatida ishlaydi. U kompaniyaga qarashli RB Leipzig, Red Bull Salzburg va New York Red Bulls kabi klublar futbol tizimini nazorat qiladi.
Shu bois uning Germaniya terma jamoasiga o‘tishi moliyaviy savollarni ham tug‘dirdi. Germaniya futbol ittifoqi prezidenti Bernd Neuendorf bu borada an’anaviy “release clause” to‘lanmasligini ma’lum qildi. Odatdagi transfer summasi o‘rniga DFB bir million yevroni orqa miya jarohatlarini tadqiq etishga ixtisoslashgan Wings for Life xayriya jamg‘armasiga o‘tkazadi. Jamg‘arma Red Bull bilan bog‘liq, ammo bu safar pul to‘g‘ridan-to‘g‘ri foydali maqsadga ketadi.
Yana bir kelishuv – terma jamoa uchta o‘yinini sharqdagi Leyptsig shahrida o‘tkazadi. Bu yerda Red Bull homiyligidagi RB Leipzig faoliyat yuritadi. Futbol va biznes yana bir bor chirmashdi, ammo DFB bu yo‘l bilan ham Kloppni, ham Red Bull’ni rozi qildi.
Uchinchi ketma-ket jahon chempionati falokati
Klopp Germaniyani qabul qilayotgan paytda, bu terma jamoani “kuchlar markazi” deb atash qiyin. DFB yozda yana bir zarbani boshdan kechirdi: Julian Nagelsmann iste’foga chiqarildi. Sabab – navbatdagi jahon chempionati fiaskosi.
Germaniya bu safar ham erta ketdi. Paragvayga qarshi 1/16 final bahsida penaltilar seriyasida mag‘lubiyat – va yana uyga erta qaytish.
Bu ketma-ket uchinchi jahon chempionati halokati. 2014-yilgi chempionlikdan so‘ng 2018 va 2022-yillarda guruh bosqichidayoq chiqib ketish, endi esa 2026-yilda 1/16 finalda yiqilish. Oxirgi beshta yirik turnirda atigi bitta pley-off g‘alabasi – u ham 2024-yilgi uy Euro chorak finaligacha bo‘lgan yo‘l.
Nemis futboli uchun bu statistika og‘riqli. Klopp esa aynan shu fon ostida ish boshlaydi.
Mainz’dan Dortmundgacha, so‘ngra Liverpool afsonasigacha
Kloppning murabbiylik yo‘li Germaniya futboli bilan chambarchas bog‘liq. U avval o‘n yildan ortiq futbolchi sifatida to‘p surgan Mainzda murabbiylikni boshladi. Keyin Borussia Dortmundda nemis futboliga yangi nafas olib kirdi, klubni yuqori bosqichga olib chiqdi, Bundesliga chempionliklari va Yevropa sahnasidagi yorqin o‘yinlar bilan nom qozondi.
So‘ng Liverpool. U erda Klopp afsonaga aylandi. 2020-yilda 30 yillik tanaffusdan so‘ng klubni liga chempionligiga yetakladi. Shuningdek, Chempionlar Ligasi g‘olibligi – klub tarixidagi oltinchi Yevropa chempionligi – ham uning qo‘li ostida keldi.
Endi esa uning oldida butun boshli millatning ishonchini tiklash vazifasi turibdi. Klub futbolidagi “heavy metal” uslubini milliy terma jamoaga ko‘chira oladimi? Savol ko‘p, vaqt esa kam.
Milliy terma jamoada ilk sinov: 11 kunda 4 o‘yin
Kloppning Germaniya bilan ilk o‘yinlari ham rahm-shafqatli bo‘lmaydi. U milliy terma jamoa murabbiyi sifatidagi birinchi sinovini Nations League doirasida topshiradi. Sentyabr oxiri va oktyabr boshida atigi 11 kun ichida to‘rtta o‘yin: raqiblar – Niderlandiya, Gretsiya va Serbiya.
Bu taqvim nafas olishga ham imkon bermaydi. Yangi murabbiy, yangi g‘oyalar, ammo darhol natija kutayotgan jamoatchilik. Aynan shunday bosim Kloppni doimiy ravishda eng yuqori darajada ushlab turgan, lekin milliy terma jamoada bu bosim yanada keskinroq bo‘ladi.
Germaniya uzoq yillik yo‘qotilgan obro‘sini qaytarish uchun Kloppga suyanmoqda. Savol bitta: u bu safar ham sahnaga chiqib, mamlakat futbolini yana bir bor dunyo tepasiga olib chiqa oladimi?
