Etihaddagi yangi davr: Maresca erasi boshlanmoqda

O‘n yil davom etgan, kuboklar bilan bezalgan Pep Guardiola davri yakunlandi. Endi esa Etihadda hamma narsa boshqatdan yozilmoqda. Sahna markazida – Enzo Maresca.

Guardiola Manchesterda ketayotib ham bo‘sh qolmadi: may oyida avval Liga Kubogi finalida Arsenalni, so‘ng FA Cup finalida Marescaning sobiq jamoasi Chelsea’ni mag‘lub etdi. Bu – Etihaddagi 19 va 20-kuboklari. Oldinroq u olti marta Premier League, uchta FA Cup, beshta Liga Kubogi va bir marta Champions League yutganini eslasak, o‘rniga kelayotgan murabbiy qanday ulkan merosni qabul olayotgani yanada ravshanlashadi.

Maresca bu tizimni chetdan kuzatmagan – u 2022-23 yilgi mavsumda aynan Guardiola shtabida yordamchi bo‘lib ishlagan. Endi esa o‘sha mashinaning boshiga o‘zi o‘tiradi. Bosim? Beqiyos.

Soya ostida boshlanayotgan inqilob

O‘zgarishlar faqat murabbiy kursisida emas. Maydonda ham yangi sahifa ochildi. Klubning ikki ustuni – John Stones va Bernardo Silva – o‘zining muvaffaqiyatlarga to‘la davrini yakunlab, mos ravishda Inter va Real Madrid safiga erkin agent sifatida qo‘shildi. Yana bir tayanch – Rodri ham xayrlashdi, u Barcelona bilan shartnoma imzoladi.

Bu uch ism – Guardiola davridagi eng muhim tayanchlar qatorida edi. Endi esa Maresca o‘sha bo‘shliqni qay tarzda to‘ldira olishi savol ostida turibdi.

Klub transfer bozorida jim turmadi. Manchester City Nottingham Forestdan Elliot Andersonni katta mablag‘ evaziga olib keldi. Klub nomi Enzo Fernández va Ayyoub Bouaddi bilan ham uzluksiz bog‘lanmoqda. Tarkib chuqurligi qog‘ozda saqlanib qolgandek, lekin ruhiy yetakchilar ketgani sezilmay qolmaydi.

Yana bir nozik nuqta: City allaqachon ikki mavsumdir Premier League kubogini qo‘lga kiritolmayapti. Guardiola o‘rnatgan mezonlarga ko‘ra bu deyarli “qabul qilib bo‘lmas” tanaffus. Avval Liverpool, so‘ng Arsenal chempion bo‘ldi. Shu fon Maresca va jamoa uchun bu mavsumni yanada og‘irlashtiradi. Mavsumoldi rasmiy start – Community Shield – ham umidni kuchaytirmadi: Mikel Arteta boshchiligidagi Arsenal Cityni 3:0 hisobida yanchib tashladi.

Haaland – yana asosiy qurol

Bir narsa esa deyarli o‘zgarmaydi. Sog‘lom bo‘lsa, Erling Haalandning jamoa to‘purari bo‘lmasligi – sensatsiya bo‘lardi. Norvegiyalik ajoyib jahon chempionatini o‘tkazdi va Premier League’dagi to‘rt mavsumining har birida kamida 22 tadan gol urib kelmoqda. O‘tgan mavsumda – 27.

Guardiola davrida butun hujum tizimi Haaland atrofida qurilgan edi. Maresca Chelsea’da ishlaganida uning qo‘l ostida eng ko‘p porlagan futbolchi Cole Palmer bo‘ldi, lekin Nicolas Jackson ham yetarlicha imkoniyat oldi – faqat ularning ko‘pini boy berdi. Endi xuddi shunday hajmdagi imkoniyatlar Haalandga tushsa, 26 yoshli forvard ularni bunchalik isrof qilmaydi. Bu – raqiblar uchun yomon xabar.

Yashirin yulduz: Khusanovga sahna tayyormi?

Manchester City uchun “breakout player” tushunchasi bu mavsum biroz g‘alati eshitiladi. Tarkib deyarli to‘liq shakllangan, katta sahnaga allaqachon chiqqan futbolchilar bilan to‘la.

Elliot Anderson allaqachon Nottingham Forest va jahon chempionatidagi o‘yinlari bilan o‘zini tanitib bo‘lgan. 17 yoshli Jeremy Monga esa Leicester’dan kelib, kelajak uchun loyiha sifatida ko‘rilmoqda, hozirgi mavsum markazida bo‘lishi ehtimoli past.

Shu fon’da e’tibor tabiiy ravishda Abdukodir Khusanovga buriladi. Aslida u o‘tgan mavsumning ikkinchi yarmidayoq yorqin ko‘rina boshlagan, lekin endi gap butun mudofaa markazini o‘z qo‘liga olish haqida ketmoqda. Sog‘lom raqobat sharoitida ham u markaziy himoyada asosiy nomzodga aylanishi mumkin bo‘lgan mavsum boshlandi. Bu – uning haqiqiy “men keldim” deb aytadigan yili bo‘lishi ehtimoli katta.

Foden uchun chiziq: yoki sakrash, yoki yana chetga

Phil Foden iste’dodini shubha ostiga qo‘yadigan jiddiy odam qolmagan. Lekin o‘tgan mavsum bu iste’dod ko‘rinmay qoldi. U butun mavsum davomida ko‘proq zaxira variantiga aylanishdi, Premier League’da 33 o‘yinda atigi yetti gol. Bunday raqamlar bilan u jahon chempionati yo‘llanmasidan ham quruq qoldi.

Endi esa vaziyat boshqacha. Yangilangan shartnoma, to‘liq o‘tkazilgan mavsumoldi tayyorgarlik va yangi murabbiy bilan toza sahifa. Maresca tizimida Foden yana markaziy figura bo‘lishi mumkin. Agar u o‘z o‘yinini topa olsa, uni to‘xtatish qiyin bo‘ladi. Aks holda, u Citydagi navbatdagi “yo‘qolib ketgan avlod” ramziga aylanib qolish xavfi bor.

Muvaffaqiyat mezoni: faqat chempionlik

Manchester City’da mezonlar aniq va yillar davomida o‘zgarmagan: Premier League yutilmadi – demak, mavsum muvaffaqiyatsiz. Guardiola davridan oldin ham shunday bo‘lgan, undan keyin ham shunday bo‘ladi.

Endi jamoa nafaqat murabbiyini, balki sardorini ham yo‘qotdi – Bernardo Silva endi bu kiyimxonada emas. Shunga qaramay, talab bir xil: may oyida kubokni yuqoriga ko‘tarmasang, bahona qabul qilinmaydi.

Maresca bu klubga qadam qo‘yar ekan, aynan shunday bosim ostiga kelayotganini juda yaxshi biladi. U Arsenalni ortda qoldirishi kerak bo‘ladi – o‘sha Arsenalni, nihoyat 22 yillik tanaffusdan so‘ng liga chempionligini qo‘lga kiritib, o‘zining psixologik to‘sig‘ini sindirgan jamoani.

Shu bilan birga, City tarkibi hamon hamma turnirlarni yutishga qodir darajada chuqur va sifatli. Muxlislar uchun bitta savol bor: may oyida yana Premier League kubogi bilan suratga tushiladimi yo‘qmi?

Eng katta savol: Maresca Guardiola soyasidan chiqa oladimi?

Guardiola ostida City o‘zini “xavfsiz qo‘llar”da deb his qilardi. Endi bu kafolat yo‘q. Maresca Chelsea bilan Club World Cup va Conference League’da g‘alaba qozondi, lekin ligadagi barqarorligi doim savol ostida bo‘lgan. Taktik jihatdan u hali Guardiola darajasiga chiqmagani aniq.

Ha, hozir uning qo‘lida avvalgi ish joylaridagidan ancha kuchli tarkib bor. Bu ko‘p narsani yengillashtiradi. Shunga qaramay, asosiy xavotir o‘sha-o‘sha: kim bo‘lmasin, shu jumladan Maresca ham, Guardiola o‘rnatgan “normal emas” standartlarga yetisha oladimi?

Bashorat: ikkinchi pog‘ona va ochiq savol

Mavsum oldidan mantiqiy qarash shuni ko‘rsatadi: Manchester City ikkinchi o‘rinni egallashi mumkin. Agar Maresca tizimi tez ishlay boshlasa, Arsenalni ham ag‘darib tashlash ehtimoli bor. Lekin Etihaddagi ilk mavsumdayoq buni uddalash – juda katta talab.

Shu bois, bu mavsum City uchun faqat bitta savolni o‘rtaga qo‘yadi: yangi davr – yana bir hukmronlik boshlanishimi yoki Guardiola davridan keyingi birinchi katta qadamda chayqalishmi?