Enzo Maresca: Pep Guardiola merosini davom ettirish sharafi
Enzo Maresca: “Pepdan keyin kelish — bu bosim emas, sharaf”
Pep Guardiola davri tugadi. Endi navbat Enzo Maresca qo‘lida. Manchester City yangi bosh murabbiyi ilk matbuot anjumanidayoq o‘zini chekinmaydigan, lekin haddan oshmaydigan murabbiy sifatida ko‘rsatdi.
Italiyalik mutaxassis Citydagi ishini bir jumla bilan ta’rifladi: bu — “imtiyoz”.
“Avvalo aytishim kerakki, bu — sharaf”, — dedi u Manchester City bosh murabbiyi sifatidagi ilk uchrashuvida. U so‘zini cho‘zmay, darhol asosiy nuqtaga o‘tdi: Pep Guardiola merosi.
Maresca ko‘p yillardan beri ochiq tan oladi — uningcha, zamonaviy futbol davrining eng yuksak mezoni aynan Pep.
“Ko‘p marta aytganman, Pepni so‘nggi 20–25 yil ichida dunyodagi eng yaxshi murabbiy deb bilaman. Lekin bu yana bir bor takrorlayman: bu sinov. Bu yoqimli. Bu imtiyoz”, — deya davom etdi u.
Guardiola 10 yil davomida Etihad Stadionida 20ta sovrin yutdi. Bu faqat statistik raqam emas, bu klub tarixini tubdan o‘zgartirgan davr. Shunday fon ortidan kelish ko‘plab murabbiylar uchun og‘ir yuk bo‘lishi mumkin. Futbol olami bunga misollarni ko‘rgan — eng yorqinlaridan biri Manchester United.
Shahardagi asosiy raqib, Manchester United, Alex Ferguson iste’fosidan keyin cho‘qqidan uzoqlashib ketdi. Sovrinlar oqimi sekinlashdi, barqarorlik yo‘qoldi, murabbiylar almashinuvi odatiy holga aylandi. Ko‘pchilik endi City ham shunday xavf ostida qoladimi, degan savolni beradi.
Maresca esa buning teskarisini o‘ylaydi. Uningcha, klubning ichki tuzilmasi Guardiola ketganidan keyin ham yuqori darajada qolishga imkon beradi.
“Menimcha, tashkilotning o‘zi eng muhim narsa”, — dedi u. “Ular (City) 17 yil ichida atigi uchta murabbiy bilan ishlashgan. Bu odatiy hol emas, bu tez-tez bo‘ladigan narsa emas”.
Bu bir jumlaning o‘ziyoq klub falsafasini ochib beradi. Tezkor qarorlar, vahimaga berilish, natija bo‘lmasa, darhol murabbiy almashtirish — bu City yo‘li emas. Uzoq muddatli reja, qat’iy tizim, barqarorlik — Maresca aynan shunga tayanyapti.
“Shuning uchun ham men ishona olaman: biz bu yerda juda katta ish qila olamiz”, — deya yakunladi u.
Guardiola davridan keyingi birinchi sahifa ochildi. Endi savol bitta: Maresca bu kitobni qanday yozadi?
