Din Thomas: UFC 330 dan keyin o‘g‘irlab qo‘yilgan lahza
Din Thomas UFC 330 dan keyingi damlarni unuta olmayapti. U Gillian Robertson mag‘lub bo‘lgan kechaning eng og‘ir zarbasini oktagonda emas, mikrofon oldida berdi.
Kanadalik jangchi Mackenzie Dern bilan ko-main eventda to‘liq masofani bosib o‘tdi, ammo hakamlar qarori bilan yutqazdi va ayollar strawweight kamaridan mosuvo bo‘ldi. Shu payt, jang ortidan kelishi kerak bo‘lgan tasalli, dalda, tahlil o‘rniga, uning bosh murabbiyi butunlay boshqa yo‘lni tanladi.
Post-shou efirida Din Thomas bitta jumla bilan hammani karaxt qildi: u endi jangchilarga burchakda murabbiylik qilmasligini e’lon qildi.
Bu e’lon oktagon yonida hali Gillianning ko‘zidagi alam so‘nmay turib yangradi. Aynan shu lahza keyinroq “jirkanch” deb ataladigan qarorga aylandi.
Stricklandning keskin zarbasi
Reaksiya uzoq kutdirmadi. Og‘zi beandaza, ammo so‘zini yashirmaydigan middleweight chempion Sean Strickland ijtimoiy tarmoqlarda portladi. U Thomas’ni ruhiy tushkunlik lahzasida emas, efir o‘rtasida “tashlab ketgani” uchun aybladi, qo‘pol so‘zlar bilan ustiga bostirib bordi va murabbiy sifatida ham, inson sifatida ham yerga urdi.
Din Thomas esa bu safar javobni mikrofon bilan emas, tavba bilan berdi.
“Bu jirkanch edi. Men uning lahzasini tortib oldim”
49 yoshli mutaxassis Deep Waters podkastida ochiq tan oldi: u bu ishni noto‘g‘ri va noto‘g‘ri vaqtda qilgan.
U jang haftasini “emosional attraksion” deb atadi. Tayyorlanish, kutish, xavotir, jangchilarning o‘zi bilan birga murabbiy ham ko‘tarilib-tushadi. Thomas yillar davomida burchakda turish o‘zi uchun yoqimli ish emasligini yashirmaganini eslatdi.
Tyron Woodley Jake Paulga nokaut bo‘lgan kecha ham u ichida chiziq tortgan: “Bu oxirgisi. Endi burchakda turmayman”, degan edi. Shunga qaramay, Gillian bilan yo‘lni davom ettirdi.
UFC 330 kechasi esa hammasi portlab chiqdi.
Thomas o‘sha lahzani eslab, so‘zlarini og‘ir tan oldi: o‘sha paytda burchakdan ketishini aytish “mutlaqo noo‘rin”, “mas’uliyatsiz” va “jirkanch” bo‘lganini ta’kidladi. U buni Gillianning mehnati, uning yo‘li, hatto mag‘lubiyatdagi matonatini so‘ndirgan, undan yorug‘ lahzani tortib olgan harakat sifatida ko‘rmoqda.
“Bu qiz bilan butun karerasi davomida ishladim. So‘nggi yetti yil – faqat biz ikkovimiz. Safarlar, lagerlar, kun-u tun mashg‘ulotlar. U yig‘lab kelgan paytlarini eslayman: ‘Ketma-ket ikki marta, uch marta yutsam edi’, derdi. Keyin u ajoyib seriyaga chiqdi, rekordlarni yangiladi. Men esa o‘sha kecha uning lahzasini o‘g‘irlab qo‘ydim”, – deya iqror bo‘ldi u.
Thomasning aytishicha, kechaning mantiqiy yakuni Gillianning yo‘lini e’tirof etish, uning rekordlari, ketma-ket g‘alabalari va chempionlik jangigacha yetib kelganini ta’kidlash bo‘lishi kerak edi. Buning o‘rniga diqqat markazi murabbiyning shaxsiy qaroriga ko‘chib ketdi.
Yettti yillik hamkorlik va bir og‘iz so‘z
Thomas podkastda Gillian Robertsonga yuzlandi. U o‘zini “uyalgan, sharmanda” deb atadi, lekin kechirim so‘rashga yetarlicha kuch topganini aytdi.
U Gillian bilan bo‘lgan yetti yillik yo‘lni esladi: rekordlar, besh janglik g‘alabali seriya, chempionlik imkoniyati, hatto UFC 330 kechasining o‘zida ham so‘nggi raundni yutib, mag‘lubiyat ichida ham kurashni tashlamagan jangchini maqtadi.
Thomasning fikricha, aynan shu matonat e’tirofga loyiq edi, nafaqat uning shaxsiy charchog‘i yoki murabbiylikdan ketish istagi.
U Gillian bilan munosabat bu bilan tugamasligini, uning yonida bo‘lishini, har qanday ko‘makka tayyorligini qayta-qayta ta’kidladı. Ammo bitta haqiqatni ham yashirmadi: o‘sha kecha u shogirdining lahzasini o‘g‘irladi.
“Faqat qochishni xohlagan edim”
Thomas o‘sha damdagi ichki holatini ham ochib berdi. Oktagondan keyin uni yana bir vazifa kutardi – tahlilchi sifatida efirga chiqish, ob’ektiv bo‘lish, hissiyotini chetga surish.
Uning ichida esa boshqa narsa qaynardi: “Bu ishni endi qilgim yo‘q. Tezroq ketib qolishni xohlayapman. Bu tugadi”, degan fikrlar aylangan.
U shu ichki bosim, charchoq va yurak og‘rig‘i ostida efirda chiziq tortdi. Keyin esa aynan shu qaror uni o‘ylantirib, butun hafta oxiri tinch qo‘ymadi.
Bugun u bitta gapni aniq aytmoqda: “Baribir noto‘g‘ri bo‘ldim. Bunday qilmasligim kerak edi”.
Endi savol bitta: Din Thomas o‘zini kechira oladimi va Gillian Robertson bilan yetti yil davomida qurilgan ishonch yana oktagon atrofiga qaytadimi?
