Di Mariadan Messiga qat’iy xabar: “U hali tugamadi”
Di Mariadan Messiga qat’iy xabar: “U hali tugamadi”
Argentina uchun alamli yakunlangan 2026-yilgi Jahon chempionatidan keyin ham Lionel Messi atrofidagi savollar tinmayapti. Lekin uning eng yaqin safdoshlariidan biri bo‘lgan Angel Di Maria bu bahsga o‘z ohirgi so‘zini aytgandek bo‘ldi.
Rosario Central safida Belgrano qarshisidagi 2:1 hisobidagi mag‘lubiyatdan keyin Di Maria matbuot oldiga chiqdi va Messi kelajagi haqida gap ketar ekan, bir lahzaga ham ikkilanmadi.
“Leo xohlaganicha davom etishi kerak, – dedi u. – Menimcha, u yana ko‘p yillar o‘ynashi mumkin. 39 yoshida ham u eng yaxshilardan biri ekanini ko‘rsatdi va tarixdagi eng zo‘r futbolchilardan biri bo‘lib qolishi mumkinligini isbotladi. Uning uchun shift yo‘q, u uchun chegaralar yo‘q.”
Ushbu so‘zlar ayni paytda milliy terma jamoa atrofidagi nozik pallaga to‘g‘ri kelmoqda. Yaqinda Leandro Paredes Messining 2026-yilgi Jahon chempionati finalini o‘zining xalqaro futbolga xayrlashuvi sifatida ko‘rganini oshkor qilgandi. Shundan beri Argentina muxlislari bitta savol bilan yashayapti: bu haqiqatan ham oxiri bo‘ldimi?
Di Maria esa buning aksini his qilayotgandek. Uningcha, Messi hali ham o‘yinning eng yuqori bosqichida hukmronlik qilishga qodir, hamon o‘zi istagancha taqdirini belgilaydigan darajadagi futbolchi.
Scaloni masalasi: oltin avlod murabbiyi
Di Maria faqat Messining kelajagi haqida emas, Argentina terma jamoasining boshqa hal qiluvchi figuralaridan biri – Lionel Scaloni haqida ham qat’iy fikr bildirdi. Albiceleste tarixidagi eng yorqin davrlaridan biri aynan uning qo‘l ostida keldi: Jahon chempionati, ikki marta Copa America va Finalissima – to‘rtta yirik sovrin bitta murabbiy hisobida.
“Scaloni terma jamoaning yetakchisi, u qolishiga umid qilaman, hammamiz uchun shunday bo‘lgani yaxshi, – dedi Di Maria. – U hozir kirib kelayotgan yosh avlodni juda yaxshi shakllantiryapti, har bir kichik detal ham yordam beradi. Qolishini istayman, bu uning qarori. Scaloni o‘zi nima xohlashini hammadan ko‘proq biladi, lekin argentinalik sifatida uning davom etishini xohlayman.”
Bu so‘zlar bejiz emas. Argentina safida yangi avlod – yosh, och, o‘zini ko‘rsatishga chanqoq futbolchilar paydo bo‘layotgan bir paytda, Di Maria Scaloni rolini “yakor” – ya’ni bu avlodni barqaror tutib turadigan markaz sifatida ko‘radi.
“Biz allaqachon tarixdamiz”
Di Maria suhbat davomida o‘z yo‘lini, bu jamoa bilan bosib o‘tilgan yillarni ham esladi. Unga ko‘ra, hozirgi tarkib allaqachon futbol tarixining eng yuksak sahifalaridan biriga nomini yozdirib bo‘ldi.
“Ular erishgan hamma narsa, erishishda davom etayotgan hamma narsa uchun faqat olqish kifoya emas, ular bundan ko‘prog‘iga loyiq, – dedi u. – Angliyani mag‘lub etish – mana shu yo‘lning cho‘qqisi bo‘ldi. Men uchun Jahon chempionati o‘sha yerda tugadi. Biz mamlakatga eng katta quvonchni hadya qildik, bu esa hamma uchun eng go‘zal narsa.”
Di Marianing bu gaplari ortida yillar davomida yig‘ilgan og‘riq, bosim va nihoyat kelgan yengillik seziladi. U ko‘p marta tanqid ko‘rdi, ko‘p marta jarohat oldi, hal qiluvchi o‘yinlarni o‘tkazib yubordi. Ammo baribir, bu avlod bilan birga cho‘qqiga chiqdi.
Jahon chempionatini tomosha qilgan Di Maria
Turnirni tomoshabin sifatida kuzatgan Di Maria, baribir, o‘zini maydondan uzib qo‘ya olmadi. Har bir o‘yin uning uchun sinov bo‘ldi.
“Har bir uchrashuvda azoblandim, – deydi u. – Lekin oxir-oqibat yigitlar ichki kuchlarini ishga soldi va aynan shu g‘alabalarga olib keldi. Final – final bo‘lib qoladi; ba’zan yutasiz, ba’zan yo‘q. Bu safar navbat bizniki emasdi, lekin o‘ylaymanki, yigitlar terma jamoa sha’nini munosib himoya qilishdi.”
Bu fikrlar bilan Di Maria bir narsani aniq ko‘rsatadi: natijadan qat’i nazar, bu jamoa mag‘lub bo‘lgan emas, balki kurashni oxirigacha olib borgan jamoa sifatida yodda qoladi.
Endi esa savol bitta: Messi va Scaloni bilan bu hikoya yana bir bob yozadimi yoki Argentina yangi davrni allaqachon boshlab bo‘ldimi?
