Cristiano Ronaldo hayotidagi muhim lahza: Georgina Rodriguez bilan turmush qurganligi
Yillar davomida millionlab muxlislar uning gollarini, rekordlarini, sovrinlarini tomosha qildi. Endi esa Cristiano Ronaldo hayotidagi eng muhim lahzalardan biriga maydon chetidan guvoh bo‘ldi: u Georgina Rodriguez bilan rasman turmush qurdi.
Brunswick Group tarqatgan ma’lumotga ko‘ra, nikoh seshanba kuni Portugaliyaning g‘arbiy qismidagi dengiz bo‘yidagi Cascais shahrida, fuqarolik marosimi tarzida o‘tkazildi. Hammasi yopiqlikda, tashqi shov-shuvsiz. Ularni atigi bitta auditoriya kuzatdi — besh nafar farzandi.
PR jamoasi bu kunni “xususiy va yaqin lahza” deb ta’rifladi. Aynan shunday ham bo‘ldi: stadionlar, tribuna, flesh-intervyularsiz. Faqat oila, faqat eng yaqinlar.
Shunga qaramay, bu voqea butunlay yashirin qolmadi. Er-xotin o‘z Instagram sahifalarida nikoh uzuklari aks etgan suratni joylashtirdi. Oddiy kadr. Lekin unda o‘n yillik hikoya, Madridda boshlangan tanishuv, birga o‘tgan sinovlar va nihoyat rasman mustahkamlangan ittifoq mujassam.
Cristiano Ronaldo — 41 yoshda. Besh karra yilning eng yaxshi futbolchisi, zamonaviy sportning eng yorqin yulduzlaridan biri. U yaqinda Portugaliya bilan o‘zining rekordni takrorlagan oltinchi Jahon chempionatida maydonga tushdi. Yillar o‘tmoqda, lekin u hamon futbol sahnasining markazida.
Endi esa uning hayotida ikki front bor: maydon va oila. Saudiya Arabistonidagi Al Nassr bilan yangi mavsum allaqachon eshik qoqmoqda — klub shanba kuni ichki chempionatdagi yurishini boshlaydi. Demak, Ronaldo uchun odatdagi ritm qaytadi: mashg‘ulotlar, safarlar, gol izlash.
Ammo Cascaisdagi o‘sha tinch, sokin marosim shuni ko‘rsatdi: hatto eng yirik yulduz ham bir paytlar stadion shovqinidan uzoqlashib, hayotidagi eng muhim qarorlarni mutlaq sokinlikda qabul qiladi. Endi u nafaqat rekordlar ortidan quvayotgan afsona, balki besh farzandli, rasman turmush qurgan oilaparvar inson.
Savol endi boshqacha: yangi mavsumda Cristiano Ronaldo faqat raqib darvozasini emas, balki o‘zining hayotiy muvozanatini ham qay darajada zabt eta oladi?
