Celtic yozgi transferi: Haissem Hassan kelishi va jamoaning muammolari
Celtic nihoyat harakatga keldi. Sky Sports ma’lumotiga ko‘ra, klub Real Oviedo qanot hujumchisi Haissem Hassan bo‘yicha rasmiy so‘rov yubordi. Misrlik futbolchi yozgi oyning boshidan beri klub bilan bog‘lanib kelayotgandi, endi esa gap og‘zaki qiziqishdan amaliy qadamga o‘tdi.
24 yoshli Hassan – Misr terma jamoasi bilan Jahon chempionati sahnasida yorqin ko‘ringan futbolchi. Dallasdagi o‘yinlarda u to‘pni oyoqqa yopishtirib oladigan, bir qarashda yo‘q joydan tezlik chiqarib, raqib chizig‘ini yorib o‘tadigan futbolchi sifatida esda qoldi. Celtic murabbiyi Martin O'Neill uni keyingi mavsum rejalarida asosiy figura sifatida ko‘rmoqda.
Muammo shundaki, bu rejalarga mos keladigan tarkib hali ham yo‘q.
O‘Neill so‘raganlar keta berdi
May oyidagi dramatik chempionlik qaytishi – klub tarixidagi eng hissiyotli lahzalardan biri bo‘ldi. O‘sha mo‘’jizani tortib chiqqan ikki asosiy qahramon – Kelechi Iheanacho va Marcelo Saracchi edi. O‘Neill yoz boshida bosh direktor Michael Nicholson va moliya bo‘yicha rahbar Chris McKaydan aynan shu ikki futbolchini saqlab qolishni qat’iy so‘ragan.
Natija? Takliflar past, ishonchsiz va oxir-oqibat muvaffaqiyatsiz.
Iheanacho ham, Saracchi ham “Paradise”ga qaytmaydigan bo‘ldi. Klub rahbariyati uchun ularning qayta sotish qiymati yetarlicha jozibali ko‘rinmagani ayon bo‘lib qoldi. Murabbiy esa yana bir bor ochiqchasiga uyatli vaziyatda qoldi: so‘ragan futbolchilari yo‘q, chempionlar ligasi oldida esa tarkibda katta bo‘shliqlar.
Bundan ham achchiqroq jihati bor. Klub ichkarisidan ommaviy axborot vositalariga Kelechi Iheanacho maosh talablari haqida, yumshoq aytganda, bahsli ma’lumotlar “sizdirilgani” aytilmoqda. Turkiyadan kelgan yangilanishlar esa bu versiyani tezda rad etdi. Ishonch zarb yedi, shubha kuchaydi.
Maeda atrofidagi savdolar, kuchaymagan jamoa
Endi esa Daizen Maeda nomi atrofida shov-shuv. Ipswich Town Celtic bilan rasmiy muzokaralarni boshladi. Maeda ketishi mumkin bo‘lgan futbolchilar ro‘yxatiga qo‘shildi, Iheanacho va Saracchi allaqachon bu ro‘yxatdan joy olgan.
Shu fon’da Haissem Hassan bo‘yicha yangilik butunlay boshqacha rang oladi. Celtic bir tomondan Jahon chempionatida o‘zini ko‘rsatgan, bir yillik shartnomasi qolgan qanot hujumchisini olib kelmoqchi. Ikkinchi tomondan esa klub siyosati o‘zgarmayapti: avval maosh varag‘ini tozalash, keyin transfer qilish. Bu yondashuv endi nafaqat asabni, balki maydondagi natijani ham yemira boshladi.
UEFA Champions League pley-off bosqichi yana yaqinlashmoqda. Vaqt siqilyapti. Tarkib esa deyarli kuchaymagan.
O‘tgan mavsum Celtic zo‘rg‘a qutulib qolgandi. Bu yil shunday omad yana takrorlanishiga hech qanday kafolat yo‘q.
Ogohlantirishlar, e’tiborsiz qoldirilgan signallar
Sobiq sardor Paul Lambert va boshqa ko‘plab sobiq futbolchilar, mutaxassislar bir narsani takrorlab kelishmoqda: bunday sustkashlik bilan Celtic uzoqga borolmaydi. Klub o‘tgan mavsumda xavfdan qochib qutuldi, lekin bunday “oyoq sudrash” ikkinchi marta kechirilmaydi.
Endi esa manzara yanada xavotirli: Iheanacho yo‘q, Saracchi yo‘q, Maeda ham ketish yoqasida. O‘Neill esa yozgi “kapital ta’mir” qilishni rejalashtirgan bo‘lsa-da, hali jarrohlik pichog‘ini qo‘lga ham ololmagandek ko‘rinadi.
Shu fon’da Anthony Joseph xabari biroz bo‘lsa-da harakat alomati bo‘lib tuyuladi. Uning ma’lumotiga ko‘ra, Celtic Real Oviedo qanot hujumchisi Haissem Hassan bo‘yicha sharoitlarni o‘rganmoqda, kelishuv imkoniyatlarini tekshiryapti. Misr terma jamoasi futbolchisi, 24 yosh, shartnoma muddati – atigi bir yil.
Ya’ni, bu yoz – uni nisbatan oqilona narxda olib kelish uchun eng qulay payt.
Savol ochiq: bu safar ham kechikishmi yoki burilish nuqtasi?
Hassan transferi, o‘zi bilan olganda, muammoni hal qilib qo‘ymaydi. Lekin u bir narsani ko‘rsatishi mumkin: Celtic nihoyat tashabbusni qo‘lga oladimi yoki yana bozor tugayotganida shoshilinch, panikaga yaqin qarorlar qabul qiladimi?
Hozirgi holatda muxlislar “taraqqiyot”dan ko‘ra “saqlab qolish” haqida o‘ylay boshlagan. Chempionlar ligasi eshik oldida turgan bir paytda, bu klub uchun juda past maqsaddir.
Haissem Hassan – tezlik, bevosita dribling va Jahon chempionatida sinovdan o‘tgan nervlarga ega futbolchi. Savol shunda: Celtic bu sifatlarni o‘z vaqtida Parkheadga olib kela oladimi yoki yana bir bor o‘zining eng katta raqibiga aylangan – sustkashlikka yutqazadimi?
