Carragher: Liverpoolning yarim himoyasi muammo
Yangi mavsumga atigi bir hafta qolgan bir paytda, Jamie Carragher “Liverpool” atrofidagi shovqindan ko‘ra, uning jim qolayotgan joyiga e’tibor qaratdi. Unga ko‘ra, muammo qanotda emas, himoyada ham emas. Eng xavfli nuqta – maydon markazi.
Andoni Iraola qo‘l ostida klub yangi davrga qadam qo‘yar ekan, “Anfield” atrofida tabiiy savol paydo bo‘lgan: bu jamoa yana chempionlik uchun kurasha oladimi? Carragherning javobi ancha sovuq.
“Men hali ham ‘Liverpool’ning yarim himoyasi juda katta muammo deb hisoblayman,” – dedi u Sky Bet taqdim etgan Overlap Fan Debate dasturining so‘nggi sonida.
Yangi davr, eski dard
O‘tgan mavsum “Liverpool” uchun og‘ir o‘tdi. Atigi beshinchi o‘rin, oxirgi turlargacha cho‘zilgan asabiy poyga va zo‘rg‘a qo‘lga kiritilgan Champions League yo‘llanmasi – bundan bir yil avvalgi chempionlikdan juda uzoq manzara.
Shu fon’da Iraola ishga kirdi. Klub yozda bozorni portlatgani yo‘q: Victor Munoz va Ronald Araujo kelishi rasman tasdiqlandi, Jeremy Jacquet bilan esa hali fevraldayoq “Rennes” bilan kelishuvga erishilgan edi. Yarim himoyaga esa jiddiy yangilanish ko‘rinmayapti.
Bu orada “Liverpool” Mohamed Salah o‘rniga yangi hujumchi izlashda davom etmoqda. Maqsadlar ro‘yxatida Bradley Barcola turibdi. Lekin Carragherning fikricha, qanotdagi bo‘shliq hozircha eng katta xavf emas.
“Maydon o‘rtasida yana bo‘shliq bor”
Carragher premyera oldidan jamoani diqqat bilan kuzatgan. U barcha o‘rtoqlik uchrashuvlarini ko‘rmaganini tan oladi, lekin ikkita sinov unga yetarli bo‘lgan: Leeds va Monacoga qarshi o‘yinlar.
U aynan o‘tgan mavsumni eslatgan nuqtani ko‘rgan.
“O‘tgan mavsum ‘Liverpool’ning muammosi shunda ediki, yarim himoyada hamma joy bo‘sh edi. Bu muammo yo‘qolganicha yo‘q,” – deydi u.
Iraola sxemasida Dominik Szoboszlai markazda yanada chuqurroq rolga o‘tayotgandek. U endi klassik “10-raqam” emas, balki markaziy uchlikdan biri sifatida, Ryan Gravenberch bilan yonma-yon ko‘rinmoqda. Ikkalasi ham “boksdan boksga” yuguradigan, oldinga intiladigan futbolchilar.
Carragher aynan shu kombinatsiyadan xavotirda.
“Bu uchlikka qarayman-da, ‘Liverpool’ uchun xavotirga tushaman. Albatta, siz Gravenberch yomon futbolchi, yoki Florian Wirtz, yoki Szoboszlai yomon deya olmaysiz. Ularning barchasi juda yaxshi,” – deydi u. – “Lekin uchlik sifatida qarasam, ichimdan ‘yo‘q, bu emas’ degan fikr o‘tadi. Go‘yo sifat haddan tashqari ko‘p, lekin hammasi o‘ynashni, yugurishni xohlaydi. Hatto premyera oldi o‘yinlarida ham raqiblar maydon o‘rtasidan bemalol o‘tib ketyapti.”
Uningcha, bu nafaqat pressing, balki strukturaviy muammo. Chiziqlar orasidagi masofa cho‘zilmoqda, himoya oldidagi “tampon zona” bo‘shab qolmoqda. Aynan shu zona o‘tgan mavsum “Liverpool”ni bir necha bor jazolagan.
Chempionlik orzusi uchun yetarli emasmi?
Klub rahbariyati hali ham bozorni kuzatmoqda, lekin hozircha markaziy yarim himoyaga yangi nom qo‘shilmadi. Iraola esa mavjud resurslardan maksimal foyda olishga majbur.
Carragher esa keskinroq: u bu tarkib bilan chempionlik poygasiga aralashish mushkul, deb hisoblaydi. Uning nazarida, yuqori sifatli individual futbolchilar jamlanmasi hali mukammal yarim himoya tizimini anglatmaydi. Ayniqsa, Premier League marafonida.
“Liverpool” yangi davrga katta savol bilan kirib boryapti: Iraola bu markaziy chiziqni tartibga solishga ulguradimi yoki chempionlik poygasi yana boshqalarning qo‘lida qoladimi?
