Carragher: Arsenal nima qilayapti?
Jamie Carragher Arsenalning navbatdagi transfer qarorini ko‘rib jim o‘tira olmadi. Uningcha, klub o‘zining eng porloq Hale End bitiruvchilaridan birini qo‘ldan chiqarishga tayyorlanayotgani – mantiqqa sig‘maydi.
Televideniye sharhlovchisi The Overlap Fan Debate dasturida aynan shuni ochiq aytdi. Uning tasvirlashicha, bu oddiy ravishda o‘yinchi ketishni istagan holat emas, aksincha klubning o‘zi tashabbus ko‘rsatgandek tuyulgan.
Carragher shunday deydi: unga ko‘ra, vaziyat go‘yoki Arsenalning o‘zi Manchester Unitedga Myles Lewis-Skelly’ni “taklif qilayotgandek” ko‘ringan. Muhimi – bu Myles Lewis-Skellyning “ketaman” deb turib olgani yoki uning atrofidagi odamlar bosim qilgani emas. Shuning uchun ham bu qaror atrofidagi hayrat, deydi u, o‘yinchining pozitsiyasidan emas, klubning o‘zidan kelib chiqadi.
Bernabeu va final – 20 yoshli yigitning vizit kartasi
Carragherning asosiy e’tirozi – bu nafaqat iste’dod, balki allaqachon eng yuqori sahnada sinovdan o‘tgan futbolchini qo‘yib yuborish xavfi.
U eslatadi: o‘tgan mavsum Myles uchun mukammal o‘tmadi, lekin bu hikoyaning faqat bir bo‘lagi. Bir yil yoki 18 oylar avval, Santiago Bernabeudagi o‘yin. Chap qanot himoyasida. 20 yoshli yigit maydon markazini o‘ynayotgandek, o‘yinni boshqarib yurgan paytlar. Carragher aynan o‘sha uchrashuvni tilga oladi: u yerda Lewis-Skelly o‘yin ritmini o‘zgartirgan, pressingdan chiqishda hal qiluvchi bo‘lgan, katta sahnadan cho‘chimagan.
Keyin esa – Paris Saint-Germainga qarshi final. Bu safar markaziy yarim himoyada. Eng yuqori bosim ostida, eng katta sahnada, u yana o‘z darajasini ko‘rsatgan. Carragherning fikricha, bunday o‘yinlarni 20 yoshida ko‘rsatish uchun futbolchi “alohida” bo‘lishi kerak. Oddiy iqtidor bilan bunday bosqichda omon qolib bo‘lmaydi.
Bunday bolani qo‘yib yuborish – xato
Carragher shuni urg‘ulaydi: yosh futbolchilar har doim tebranish davridan o‘tadi. Kimdadir bir mavsum zo‘r o‘tadi, keyingisi biroz sustroq bo‘ladi. Myles ham o‘tgan mavsum o‘zi xohlagancha ko‘p o‘ynamadi, bu haqiqat. Lekin bu uning shiftini pasaytirmaydi.
Uningcha, Lewis-Skellyning “potensial shift”i – juda baland. 20 yoshida Bernabeu va finaldagi ko‘rinishlar buni isbotlab bo‘lgan. Shuning uchun Carragher Arsenalning bu futbolchini sotish fikrining o‘ziyoq uni hayratga solganini yashirmaydi. U “hali ham ishonolmayman” deya ta’kidlaydi va bu qarorni “g‘alati” deb ataydi.
Savol esa endi ochiq qoladi: Hale Enddan chiqqan, yirik sahnada allaqachon o‘zini ko‘rsatgan bunday yigitni qo‘yib yuborish – strategik qayta qurishmi yoki kelajak yulduzini raqibga sovg‘a qilishmi?
