Carlos Baleba: Old Trafford uchun xavfmi yoki yo‘qolib borayotgan bo‘ron?
“Manchester United” nihoyat uzoq vaqt kuzatib kelgan o‘ljasiga juda yaqin. Klub “Brighton” bilan Carlos Baleba transferi borasida to‘liq kelishuv yoqasida turibdi, futbolchi uchun besh yillik shartnoma allaqachon tayyor. Hali yakuniy narx va to‘lov tuzilmasi bo‘yicha nuqta qo‘yilgani yo‘q, lekin bitim 60 million funtdan oshishi kutilmoqda. Bu endi oddiy transfer emas, bu – markaziy chiziqqa tikilgan yirik garov.
22 yoshli kamerunlik tez orada Manchesterga uchishga hozirlanayotgani aytilmoqda. Tibbiy ko‘rik ham bitim rasmiylashishi bilanoq shoshilinch rejalashtiriladi. Klub ichida jarayon tezlashgan, vaqt cho‘zilmayapti – bu “United”ning unga bo‘lgan ishonchi va shoshilinch ehtiyojidan darak.
Baleba hozircha mavsumoldi davrida olgan tovon boylamlari (ligament) jarohatidan tiklanmoqda. Ammo bu jarohat uni uzoq muddat maydondan chetlatib qo‘yishi kutilmayapti. Shunga qaramay, “United” uni yoz bo‘yi eng ustuvor nishonlaridan biri sifatida ushlab turdi va endi u Andrey Santos hamda Youri Tielemansdan keyin yarim himoyaga uchinchi qo‘shilish bo‘lishi mumkin.
Brighton’dagi meteorit parvozi va keskin tormoz
Carlos Baleba nomi bir yil avval butun Premyer-ligada baland yangragan edi. “Brighton” safidagi yorqin mavsum, o‘shanda atigi 21 yosh bo‘lgan futbolchini Yevropaning yirik klublari ro‘yxatining yuqori qatoriga olib chiqqan. “Manchester United” ham o‘shanda uning atrofida aylangan, uni o‘rta chiziqni o‘zgartirib yuborishi mumkin bo‘lgan futbolchi sifatida ko‘rgan edi.
Ammo “Brighton”ning 100 million funtdan yuqori deb baholangan narxi hammasini to‘xtatib qo‘ydi. Transfer amalga oshmadi, Baleba “Amex”da qoldi.
Shundan so‘ng esa keskin pasayish. Ko‘rsatkichlar tushdi, o‘yindagi ishonch ham. Ba’zi paytlarda u bir yil avval muxlislarni hayratga solgan futbolchining soyasidek ko‘rindi. 2023 yilda “Lille”dan kelib qo‘shilgan yarim himoyachi “Brighton” safida 112 o‘yin o‘tkazdi, o‘tgan mavsumda 35 bor maydonga tushdi. Yil davomida Afrika Millatlar Kubogida Kamerun sharafini himoya qilgani uchun ham ma’lum muddat klubdan uzoq bo‘ldi.
Shu fon’da “United”ning bu miqdordagi pulni tikishi – shubhasiz, tavakkal. Lekin aynan shunday tavakkarlar ba’zan klub falsafasini o‘zgartiradi.
“United”ga kerak bo‘lgan profil
“Old Trafford”ga hozir bir narsadan ko‘proq narsa kerak emas: o‘rta chiziqda hokimiyat. O‘yin ritmini boshqaradigan, ayniqsa, chuqurroq zonalarda to‘pni qaytarib olishga qodir futbolchi. Baleba aynan shuni olib kelishi mumkin bo‘lgan nomzod sifatida ko‘rilmoqda.
Uning atletizmi, tajovuzkorligi va to‘pni o‘zi bilan birga maydon markazidan yuqoriga ko‘tarib chiqish qobiliyati “United”ning bugungi tarkibida yetishmayotgan dinamika va po‘latni beradi. Andrey Santos va Youri Tielemans – aqlli transferlar. Ammo ular boshqa tipdagi yarim himoyachilar. Baleba esa mutaxassis himoyaviy quvvat, shu bilan birga jismoniy kuch orqali jamoani oldinga sudray oladigan profil.
22 yosh – bu ham katta omil. So‘nggi mavsumdagi notekis o‘yiniga qaramay, uning atrofida hali ham bitta qat’iy fikr bor: to‘g‘ri muhitda u dunyoning eng kuchli markaziy yarim himoyachilaridan biriga aylanishi mumkin. Bu orzu tasodif emas.
U o‘zini shakllantirishda Paul Pogba, Yaya Toure, Andres Iniesta kabi nomlardan ilhom olganini ochiq aytgan. Neymar va Ronaldinho esa bolalikdagi sevimli tomoshasi bo‘lgan. Demak, unda faqat jismoniy kuch emas, o‘yinda o‘zini ifoda etish, maydonda ijod qilish istagi ham bor. Bu esa “Old Trafford” sahnasida talab qilinadigan ruh.
Garovning narxi va mukofoti
Shubha yo‘q: bu transfer xavf bilan birga keladi. “United” so‘nggi 12 oy ichida ko‘rinib turgan Baleba emas, kelgusi besh-yetti yilda qanday futbolchiga aylanishi mumkin bo‘lgan Balebaga pul tikmoqda.
Bu narx uchun savol tabiiy: u tavakkalga arziydimi?
“United” yillar davomida markazda barqarorlik topa olmay kelmoqda. O‘yin ritmi tez-tez qo‘ldan chiqadi, raqiblar o‘rta chiziqni juda oson bosib o‘tadi. Agar klub nihoyat pozitsion ustunlikni qaytarib olishni xohlasa, aynan shunday profildagi yarim himoyachiga murojaat qilishi kerak edi.
Baleba jarohatdan to‘liq tiklanadi, yangi muhitda o‘zini topadi, yonida tajribali hamkorlar bilan o‘ynaydi – bu ssenariy ishlasa, “United” o‘rtadagi muammosini yillar davomiga yopib qo‘yishi mumkin. Aks holda, bu transfer klubning so‘nggi yillardagi eng qimmat saboqlaridan biriga aylanadi.
Hozircha bitta narsa aniq: “Old Trafford” yana bir bor katta garov qo‘ymoqda. Endi savol shuki, Carlos Baleba bu garovni yutug‘a aylantira oladimi yoki “United” uchun navbatdagi og‘riqli tajribaga aylanadimi?
