Calvin Ramsay: Liverpooldagi yo‘li yakunlanmoqda
Calvin Ramsay uchun bu deyarli yakun. Kamida “Anfield”dagi bob shunday tugayapti.
23 yoshli shotlandiya himoyachisi bu mavsumni ijarada St. Mirren safida o‘tkazadi va bu qaror, amalda, uning Liverpool bilan yo‘llari ajralganini anglatadi. Shartnomasi 2027-yil yozigacha amal qiladi, lekin bu ko‘chishdan keyin uni yana qizil libosda tasavvur qilish qiyin.
Liverpool hozir o‘ng qanot himoyasida ishonchli variantlarga unchalik boy emas, shunday bo‘lsa-da, klub Ramsay uchun eshikni yopdi. Faqat bir ehtimol qolgan: Shotlandiya chempionatida yarim mavsumlik shunchalik yorqin o‘yin ko‘rsatishi kerakki, yanvarda qaytarib chaqirish haqida o‘ylashsin. Bu esa, hozirgi vaziyatda, mo‘jizaga yaqin ssenariy.
Bu yakun Ramsay klubga kelgan paytdagi kayfiyat bilan keskin zid. 2022-yilda Liverpool uni Aberdeen safidan 4,2 million funt evaziga olib kelganida, bu shotland klub uchun rekord transfer edi. Atigi 18 yosh, 28 ta birinchi jamoa o‘yini va allaqachon Angliyaning grandiga o‘tish – bu transfer ko‘plarning diqqatini tortgan, savollarni ham, katta umidlarni ham tug‘dirgan edi.
O‘sha ilk mavsumoldi yig‘inlarida bu umidlar o‘zini oqlayotgandek ko‘ringan. Ramsay tezligi, texnikasi va jasoratli o‘yin uslubi bilan o‘ng qanotdan hujumga qo‘shilib, Liverpool kelajagidagi muhim bo‘laklardan biri bo‘lishi mumkinligini eslatib turardi.
Keyin esa tana chidamadi.
Jiddiy jarohatlar ketma-ketligi, jumladan, klubga kelganida ham unga hamroh bo‘lgan va tez orada operatsiya talab qilgan umurtqa muammolari, Anfielddagi karerasini ildizidan kesdi. U o‘sha og‘riqlar bilan ilk o‘yinlarini ham o‘tkazgan, lekin jarohat bilan kurash uzoq davom etmadi.
Shundan so‘ng Ramsay uchun ijaralar karuseli boshlandi. Preston North End, Bolton, Wigan, keyin esa Kilmarnock. Har bir yangi manzil – yana bir urinib ko‘rish, yana bir qayta tiklanish umidi. Har safar u maydonga qaytib, o‘sha Aberdeen davridagi o‘ziga o‘xshashga harakat qildi.
Ammo har bir ijara davri tugagach, savol o‘zgarmascha qoldi: u avvalgi yo‘nalishiga qayta oladimi? Javob esa tobora salbiy tus ola boshladi. Klub tanlovlari ham buni ko‘rsatib turardi – har galgi manzil oldingisiga qaraganda biroz pastroq darajadagi jamoa bo‘lib chiqdi. Bu esa Liverpooldagi istiqbolning sekin, ammo qat’iy so‘nayotganidan darak edi.
Endi navbat St. Mirrenga keldi. Bu transfer Ramsay uchun orqaga qadamdek ko‘rinishi mumkin, lekin ayni paytda u uchun eng real sahna – qaytadan nafas olish, muntazam o‘yin amaliyoti topish, o‘z tanasiga va o‘yiniga ishonchni qaytarish imkoniyati.
Liverpool uchun bu, ehtimol, jim, shovqinsiz xayrlashuv. Hech qanday katta shiorlar, tantanali vidolashuvlar yo‘q. Faqat bir paytlar katta umidlar bilan kelgan, lekin jarohatlar girdobida qolib ketgan iste’dodning sokin ketishi.
Ramsay uchun esa bu hali ham yakun emas. Agar u St. Mirren safida sog‘lom qolsa, ritm topsa, o‘sha bir paytlar 4,2 million funtlik sarmoyani oqlashiga ishongan skautlarni eslatadigan o‘yinini qaytara olsa, u hali ham Shotlandiya darajasida barqaror, asosiy tarkib futbolchisiga aylanishi mumkin.
Savol bitta: bu mavsum uning yo‘lini pastga qarab davom ettiradimi yoki nihoyat, uzoq kutilgan burilish nuqtasiga aylanadimi?
