BlueCo davri: katta pul va kutilmagan qulashlar
Stamford Bridge so‘nggi yillarda rekordlar, murabbiylar almashinuvi va uzundan-uzoq shartnomalar girdobida yashadi. BlueCo davrining transfer siyosati esa nafaqat muxlislarni, balki butun Premyer ligani hayratda qoldirdi. Katta sarlavhalar, ulkan summalar, lekin juda ko‘p bo‘sh va’da. Quyidagi nomlar – aynan shunday umidlar va xatolarning jonli timsoli.
Carney Chukwuemeka: shov-shuvli kelish, sokin ketish
Carney Chukwuemeka uchun to‘langan 20 million funt – bu kelajak uchun sarmoya sifatida ko‘rilgandi. Aston Villa safida porlagan, Angliya U-19 Yevropa chempionligini zabt etgan iqtidor. Qog‘ozda hammasi ideal ko‘rinardi.
Amalda esa – deyarli mutlaqo bo‘sh davr. Jarohatlar, murabbiylar ishonchining yo‘qligi, uzilib-qirqilib o‘ynalgan daqiqalar. Ikki yarim yil ichida atigi 32 o‘yin. Shundan so‘ng Borussia Dortmund safariga avval ijaraga, keyin to‘liq o‘tish. Stamford Bridge’dagi faoliyati esa deyarli iz qoldirmasdan tugadi.
Christopher Nkunku: pre-sezondagi tizzadan boshlangan tushkunlik
Christopher Nkunku transferi – BlueCo davrining eng balandparvoz rejalaridan biri edi. RB Leipzigda Bundesligani larzaga keltirgan, 52 million funtlik hujumchi, kelasi yillar uchun hujum markazi sifatida tasavvur qilingan.
Lekin hammasi pre-sezondayoq chilparchin bo‘ldi. Jiddiy tizza jarohati uni 2023-24 mavsumining yarmidan ko‘piga olib chiqib tashladi. Qaytgach ham eski portlash yo‘q edi. 2024-25 mavsumida u faqat epizodik rolga tushib qoldi, Cole Palmer esa hujumdagi haqiqiy yulduzga aylandi. Natija aniq: atigi 27 ta Premyer liga o‘yini va yozda AC Milan tomon yo‘l. Katta loyiha bir necha faslga ham cho‘zilmadi.
Alejandro Garnacho: Old Trafforddagi chaqnashdan keyingi so‘nish
Alejandro Garnacho transferi boshida bozorni sezgan mahoratdek ko‘ringandi. Manchester United uni Ruben Amorim qo‘l ostida chetga surgan paytda Chelsea 40 million funt to‘lab olib ketdi. Raqibdan yosh yulduzni tortib olish – qog‘ozda bu zo‘r g‘oya.
Ammo Garnacho Londonda boshqa futbolchi bo‘lib qolgandek edi. Old Trafforddagi beomon driblinglar, jasoratli reydlar – hammasi g‘oyib bo‘ldi. O‘ng qanot emas, chap qanot, murabbiylar almashinuvi – baribir natija bir xil: Enzo Maresca ham, Liam Rosenior ham uni asosiy tarkibga mustahkam o‘rnata olmadi. Chap qanotdagi ko‘plab rangsiz o‘yinlar, hech esda qolmaydigan kechalar. Klub endi yo‘qotishlarni imkon qadar tezroq qoplashni istayapti, ammo 43–45 million funt atrofidagi narxga xaridor topish – o‘zi bir muammo.
Pierre-Emerick Aubameyang: bir kun ichida ma’nosizlangan transfer
Bu hikoya deyarli ramziy. Thomas Tuchelning shaxsiy so‘rovi bilan Barcelona’dan kelgan Pierre-Emerick Aubameyang, ammo nemis murabbiy birinchi o‘yinidan atigi bir kun o‘tib ishdan bo‘shatiladi. Shundan so‘ng bu transferning taqdiri deyarli aniq bo‘lib qolgandi.
Graham Potter uni hech qachon to‘liq ishonch bilan maydonga tashlamadi, vaqt o‘tishi bilan esa butunlay chetga surdi. Yakunda erkin agent sifatida Marseille tomon ketish. Bir mavsum, 21 o‘yin, 3 gol. Shuncha tajriba, shuncha nom, lekin Stamford Bridge’dagi davr – kulis ortidagi qisqa epizod bo‘lib qoldi.
Kalidou Koulibaly: kechikkan transfer va yo‘qolgan obro‘
Napoli davrida Kalidou Koulibaly Yevropaning eng kuchli markaziy himoyachilaridan biri sifatida tilga olinardi. 2022-yilda BlueCo davridagi ilk transfer oynasida uning kelishi himoyani tubdan o‘zgartiradi, degan ishonch bor edi.
Ammo Chelsea ichidagi notinchlik, murabbiylar almashinuvi, tizimlarning doimiy o‘zgarishi fonida Koulibaly ham o‘z o‘yinini topa olmadi. Ba’zi yirik xatolar, muhim lahzalarda ishonchsizlik – va u hech qachon jamoaning tayanch ustuniga aylanmadi. Bir mavsumdan so‘ng klub yo‘qotishlarni qabul qildi va uni Saudiya Arabistonidagi Al-Hilalga sotdi. U esa Fors ko‘rfaziga ketgan yulduzlarning ilk to‘lqinidan biri bo‘lib tarixda qoldi.
Raheem Sterling: shov-shuvli boshlanish, jim tugash
BlueCo davrining “marquee signing”i bo‘lishi kerak edi. Raheem Sterling – Manchester City bilan bir necha bor chempion bo‘lgan, Premyer ligadagi isbotlangan to‘purarlardan biri, 47,5 million funtlik kelishuv. Chelsea hujumi uchun tayyor yechimdek ko‘ringandi.
Lekin ikki mavsum o‘tib, raqamlar ham, ta’sir ham kutilgan darajaga yetmadi. Natija keskin bo‘ldi: Maresca uni mashhur “bomb squad” tarkibiga jo‘natdi, keyin 2024-25 mavsumini Arsenal safida unchalik muvaffaqiyatli bo‘lmagan ijarada o‘tkazdi. Stamford Bridge’ga qaytgach ham vaziyat o‘zgarmadi – u baribir chetga surilgancha qoldi. Oxiri 2026-yil yanvarida shartnoma bekor qilindi. Oxirgi o‘yinidan 18 oy o‘tib. Shunday yakun – bu darajadagi ism uchun og‘ir zarba.
Joao Felix: ikki bor sinov, ikki bor hafsalasi pir bo‘lgan loyiha
BlueCo rahbariyati Joao Felix’ni shunchalik xohladiki, uni ikki marta olib keldi. Birinchisi – 2023-yil yanvaridagi ulkan xarajatlar oynasida Atletico Madriddan qisqa muddatli ijara. U yerda ham, Londonning g‘arbida ham u hech qachon to‘liq ochilib ketmagandi. Fulhamga qarshi debyutdagi qizil kartochka esa bu hikoyaning ramziga aylandi.
Shunga qaramay, 2024-yilda Barcelona safidagi unumli mavsumdan keyin klub yana uni qaytarishga qaror qildi. Bu safar ham ssenariy o‘zgarmadi: Maresca qo‘l ostida atigi yarim mavsum, ko‘zga tashlanarli izsiz o‘tgan o‘yinlar va keyingi ijaraga – AC Milan tomon yo‘l. 2025-yil yozida esa u butunlay Al-Nassrga sotildi. Ikki bor berilgan imkoniyat, lekin hech biri Chelsea uchun haqiqiy yutuqqa aylanmadi.
Facundo Buonanotte: “ko‘z ochib yumguncha” tugagan tajriba
Facundo Buonanotte transferi hatto o‘zi ham kutilmagandek taassurot qoldirdi. 2025-yil yozining oxirgi kunlarida Brighton’dan ijaraga olindi – ehtimol, Enzo Maresca uchun zaxiradagi ijodkor yarim himoyachi sifatida.
Amalda esa u deyarli maydonga ham chiqmadi. Jami 8 o‘yin, shundan faqat bittasi – Premyer ligada. Ko‘p o‘yinlarda umuman zayavkaga kiritilmaslik, ritm yo‘qligi va oxir-oqibat 2026-yil yanvarida ijaraning muddatidan oldin bekor qilinishi. Keyingi yarim mavsumni Leeds safida ham xuddi shunday rangsiz o‘tkazdi. London davri esa ko‘pchilikning xotirasida ham qolmadi.
Deivid Washington: uch o‘yin va unutilgan “loyiha”
Deivid Washington nomini eshitmagan bo‘lsangiz, ajab emas. U hanuz Chelsea futbolchisi hisoblanadi, ammo bu uch yil ichida asosiy jamoa safida atigi uchta o‘yin (2023-24 mavsumida) o‘tkazgani bilan cheklanib qolgan. Santosdan 17 million funt evaziga kelgan, uzoq muddatli shartnoma imzolagan yosh hujumchi bo‘lishiga qaramay.
Asosiy maydon o‘rniga u deyarli butun vaqtini rivojlanish jamoasida o‘tkazdi. 2025-yilda yana Santosga ijaraga qaytdi, lekin u yerda ham sezilarli iz qoldira olmadi va chaqirib olindi. Endi 21 yoshda, istiqbol esa aniq: Stamford Bridge’da kelajak yo‘q. Uning doimiy transferi faqat vaqt masalasi bo‘lib turibdi.
Mykhailo Mudryk: doping bilan yakunlangan dahshatli sarguzasht
Mykhailo Mudryk atrofidagi shov-shuv boshida butun Yevropani qamrab olgandi. 2023-yil yanvarida Shakhtar Donetskdan 89 million funt evaziga kelgan qanot futbolchisi, tezlik, beomon dribling, yosh va cheksiz potensial. Chelsea muxlislari yangi superyulduz kutishardi.
Lekin maydonda ko‘rinish boshqacha bo‘ldi. U ko‘pincha o‘ziga bo‘lgan ishonchni yo‘qotgan, qaror qabul qilishda qiynalayotgan futbolchi sifatida namoyon bo‘ldi. Murabbiylar almashdi, tizimlar o‘zgardi, ammo Mudryk baribir tarkibdan kirib-chiqib yuradigan o‘yinchiga aylandi. 2024-yil noyabrida esa u vaqtincha diskvalifikatsiya qilindi. O‘sha kundan beri u maydonga qaytmadi.
2026-yil aprelida Futbol assotsiatsiyasi unga maksimal – to‘rt yillik doping taqiqini bergani ma’lum bo‘ldi. Mudryk apellyatsiya berdi, hatto 2026-27 mavsumida qaytishi mumkinligiga ishongani haqida xabarlar paydo bo‘ldi. Ammo bitta savol hanuz ochiq turibdi: u yana hech qachon Chelsea libosini kiyadimi?
BlueCo davrining bu hikoyalari bir narsani ko‘rsatib turibdi: katta pul har doim ham katta natija bermaydi. Endi esa savol yanada keskinlashadi – Stamford Bridge bu xatolardan qanday xulosa chiqaradi va keyingi katta transfer nomi shu ro‘yxatga qo‘shilmasligiga qanday kafolat beradi?
