Barcelona Adeyemi bilan og‘zaki kelishuvga erishdi
Yozgi bozor hali rasman qizib ulgurmay turib, Barcelona allaqachon o‘zining navbatdagi katta zarbasini rejalashtirib bo‘ldi. Kataloniya klubi Karim Adeyemi bilan og‘zaki kelishuvga erishgani aytilmoqda. Uzoq muddatli shartnoma bo‘yicha yo‘l ancha tozalangandek: endi hammasi Barcelona va Borussia Dortmund o‘rtasidagi narx savdosiga borib taqaladi.
Dortmund o‘z tezkor yulduzini arzoniga qo‘yib yuborishni istamayapti. Klub Adeyemini taxminan 40 million yevroga baholamoqda. Bu — mantiqiy raqam: Germaniyada eng xavfli qanot futbolchilaridan biriga aylangan, shartnomasi esa hal qiluvchi bosqichga kirib kelgan payt. Agar hozir sotilmasa, keyingi yozda BVB uni ancha past narxga yo‘qotib qo‘yishi mumkin.
Flick rejasining markazida – Adeyemi
Ushbu transfer ortida turgan asosiy kuchlardan biri — Hansi Flick. Barcelona bosh murabbiyi Adeyemini Germaniya terma jamoasidan juda yaxshi biladi. U futbolchining portlovchi tezligi, to‘g‘ri chiziqli yugurishlari va pressingdagi agressiyasini o‘z tizimi uchun ideal qurol sifatida ko‘rmoqda.
Flickning futbol falsafasi yuqori pressing, tez o‘tishlar va raqib mudofaasini doimiy bosim ostida ushlashga qurilgan. Adeyemi esa aynan shunday muhitda yorqin ochiladigan hujumchi. U butun hujum chizig‘i bo‘ylab o‘ynay oladi, qanotdan ham, markazdan ham tahdid soladi. Bu esa Lamine Yamal va Raphinha allaqachon bor bo‘lgan chiziqqa yangi ritm, yangi keskinlik olib kirishi mumkin.
Barcelona hujumi shundoq ham iste’dodlarga boy. Lekin hozirgi loyiha tezlik va vertikal o‘yin atrofida qayta qurilmoqda. Adeyemi bu rejada faqat bitta detal emas, balki Flickning yangi Barcelonasi uchun asosiy bo‘laklardan biri bo‘lishi mumkin.
Jorge Mendes sahnaga chiqdi
Bu transferni tezlashtirayotgan yana bir omil — super-agent Jorge Mendesning ishtiroki. Adeyemi aynan uning mijozlaridan biri. Mendes futbolchini Barcelona rahbariyatiga avval ham bir necha bor taklif qilgan, ammo klubning moliyaviy muammolari bitimni imkonsiz qilib kelgan edi.
Endi esa Camp Nou atrofida boshqacha manzara. Moliyaviy siyosat ancha qat’iylashtirilgan, yondashuv — tartibliroq. Shuning uchun Mendesning navbatdagi urinishida muzlar nihoyat eriyotgandek. Adeyemi bo‘yicha muzokaralar real tezlikda olg‘a siljiyotgani haqida xabarlar ko‘paymoqda.
Adeyemi bor, lekin “to‘qqizinchi raqam” rejasi o‘zgar maydi
Kenglikka qaratilgan bu katta qadam Barcelona uchun yozgi transferlar yakuni degani emas. Fabrizio Romano ma’lumotiga ko‘ra, Adeyemining kelishi klubning asosiy markaziy hujumchi izlash rejasini o‘zgartirmaydi. Julian Alvarez hanuz “to‘qqizinchi raqam” pozitsiyasi uchun birinchi raqamli maqsad bo‘lib qolmoqda.
Alvarezga bo‘lgan qiziqish may oyidan beri davom etmoqda. Klub rahbariyati uni nafaqat hozirgi raqobat, balki uzoq muddatli yechim sifatida ko‘rmoqda: jarima maydoni ichida aniq yakunlovchi, bosim ostida to‘pni saqlab qoladigan, katta sahnadan qo‘rqmaydigan hujumchi sifatida.
Agar Barcelona yozni Adeyemi va Alvarez bilan yakunlasa, Flick qo‘lida ikki xil profilga ega, lekin bir-birini mukammal to‘ldiruvchi hujum chizig‘i paydo bo‘ladi. Bu esa nafaqat La Liga, balki Yevropa sahnasida ham jiddiy signal bo‘ladi.
40 millionlik masala va “ijodkor” yechimlar
Biroq bir savol hanuz ochiq: 40 million yevrolik talabni Barcelona qanday yopadi? Klub hali ham ish haqi va transfer xarajatlarini qat’iy nazorat ostida ushlashi kerak. Shu bois Kataloniya rahbariyati naqd pulni kamaytirish uchun ijodkor yo‘llarni izlayapti.
Eng real variantlardan biri — bitimga futbolchi qo‘shish. Dortmundni qiziqtirishi mumkin bo‘lgan nomlar allaqachon tilga olinmoqda. Xabarlar bo‘yicha, Roony Bardghji va Guille Fernandez ehtimoliy almashinuv ro‘yxatida bor.
Bardghji Barcelona safini katta umidlar bilan to‘ldirgan, lekin birinchi jamoada muntazam o‘yin amaliyotini topa olmayapti. Uning hafsalasi pir bo‘lgani, yangi sahna izlayotgani haqida gaplar bor. Dortmund uchun esa bunday profil — yosh, texnik, yuqori potentsialga ega futbolchi — har doim qiziqarli.
Guille Fernandez esa allaqachon BVB skautlarining diqqat markazida. Dortmund yillar davomida aynan shunday yoshlarni olib, ulardan tayyor yulduz yasash bo‘yicha o‘ziga xos zavodga aylangan. Barcelona uchun esa bunday iste’dodni qo‘yib yuborish oson bo‘lmaydi, lekin Adeyemi darajasidagi tayyor futbolchini olib kelish uchun murosaga borishga to‘g‘ri kelishi mumkin.
Barcelona qanchalik uzoqqa boradi?
Mavsum boshlanishiga hali vaqt bor, lekin Barcelona allaqachon o‘z niyatini yashirmayapti: tezlik, pressing va yosh energiyasi atrofida qayta qurilgan jamoa. Adeyemi bo‘yicha muzokaralar bu yo‘nalishni yaqqol ko‘rsatib turibdi.
Savol bitta: Camp Nou tribunalarida tez orada Lamine Yamal, Raphinha va Adeyemi birgalikda qanotlardan bo‘ron ko‘targan hujumni ko‘ramizmi — va agar ko‘rsak, bu yangi Barcelona Yevropaning eng yuqori pog‘onasiga qaytishi uchun yetarlimi?
