Aston Villa Rafael Leao uchun muzokaralarda
Aston Villa yozgi bozorning eng shov-shuvli harakatlaridan biriga qo‘l urdi. Klub AC Milan hujumchisi Rafael Leao bo‘yicha rasmiy qiziqish bildirgani va ikki tomon o‘rtasida muzokaralar boshlanganini Italiyadagi manbalar tasdiqlamoqda.
Portugal qanot hujumchisi bu g‘oyaga ochiqligini bildirgan, Villa esa 1-sentabr – “Deadline Day”ga qadar bitimni yopishga urinmoqda. Vaqt kam, bosim katta.
Watkins soyasida qolgan hujum chizig‘i
Birmingham klubi old chiziqda qo‘shimcha kuch izlashga majbur. Ollie Watkins kelajagi hamon mavhum: Saudi Pro League flagmani Al Hilal bilan muzokaralar ketmoqda, kamida bitta taklif allaqachon rad etilgan.
Yakshanba kuni Brighton qarshisidagi 0:4 hisobidagi og‘ir mag‘lubiyatda Watkins umuman zayavkaga kiritilmadi. O‘yindan keyin bu borada so‘ralgan savolga Unai Emery “Uni o‘zidan so‘rang. Men buni faqat jimlik bilan izohlashim mumkin”, deb javob berdi. Qisqa, ammo juda ko‘p narsani anglatadigan javob.
Keyinroq xabarlar: ingliz hujumchisi dushanba kuni mashg‘ulotlarga qaytdi va o‘zining yo‘qligi uchun jamoadoshlaridan uzr so‘ragani aytilmoqda. Lekin ishonch allaqachon chayqalgandek.
Brighton bilan o‘yinda Villa old chizig‘ining holati ochiq ko‘rindi. Emi Buendia va Ross Barkley majburiy “soxta” hujumchi sifatida o‘ynadi. Tammy Abraham va atigi 17 yoshli Brian Madjo jarohat tufayli chetda. Bu darajadagi klub uchun bu – xavfli zaiflik.
Yevropa liqillagan yoz: ketganlar ro‘yxati uzun
Emery o‘zining Yevropa Ligasini yutgan yadrosi qanday parchalanganini tomosha qilib turibdi. Youri Tielemans, Morgan Rogers, Lucas Digne, Ezri Konsa – barchasi ketdi. Endi Watkins va Emiliano Martinez ham chiqib ketishi mumkin bo‘lganlar ro‘yxatida.
Shu fon’da Leao shunchaki “rotatsiya” uchun futbolchi emas. Bu – bayonot. Ambitsiya.
27 yoshli hujumchi bir necha yil davomida Premier League bilan bog‘lab kelinadi. O‘tgan mavsumda u Serie A doirasida 29 uchrashuvda 9 ta gol urdi va 3 ta golli uzatma berdi. Markaziy hujumchi, ikkinchi forvard yoki chap qanotda o‘ynay olishi uni aynan Rogers o‘rnini bosishi mumkin bo‘lgan variantga aylantiradi: old chiziq bo‘ylab erkin harakat, tezlik, to‘p bilan raqibga “yugurish”, har tomondan darvozani nishonga olish.
Villa uchun hozir aynan shunday moslashuvchan, darajali hujumchi yetishmayapti.
Leao – Emery qo‘lida yangi loyiha?
Rafael Leao so‘nggi yillarda jahon futbolidagi aksiyalari biroz tushgan futbolchilardan. Bunga murabbiylar almashinuvi, rolning doimiy o‘zgarishi, tizimdagi beqarorlik ham sabab bo‘ldi. Ammo shunday futbolchini qayta “yoqib yuborish” uchun Emerydan yaxshiroq murabbiy topish qiyin.
Marcus Rashford bilan sodir bo‘lgan o‘zgarish esga tushadi: to‘g‘ri tizim, aniq rol, ishonch – va butunlay boshqa darajadagi o‘yinchi.
Villa esa Leao uchun mukammal sahna taklif qila oladi: Champions League ishtiroki, asosiy tarkibda markaziy rol, Premier League vitrinasida o‘zini qayta ko‘rsatish imkoniyati. Klub yulduz futbolchilar ketishidan hosil bo‘lgan bo‘shliqni to‘ldirishi kerak, Leao esa aynan shu “yulduz darajasidagi bo‘shliq”ni berkitishi mumkin.
Bu transfer ikki tomon uchun ham mantiqan to‘liq mos keladigan bitimga o‘xshaydi.
Begovic: “Bu Villa uchun shunchaki yaxshi emas, ajoyib xabar bo‘ladi”
Sobiq AC Milan va Chelsea darvozaboni Asmir Begovic bu nomni eshitib hayratga tushgani yo‘q. U Leao bilan birga o‘ynagan, uni ichidan biladi.
Uning fikricha, agar bitim amalga oshsa, bu Villa muxlislari uchun “aql bovar qilmas darajadagi” yangilik bo‘ladi. U Leao’ning tezligi, kuchi, texnikasi haqida gapirar ekan, aynan Premier League uchun yaratilgandek futbolchi ekanini urg‘ulaydi.
Begovic Milan davrini eslar ekan, Leao tajribali futbolchilar yonida ulg‘aygani, muntazam o‘yin amaliyoti olgani, keyin esa murabbiylar almashinuvi hammasini chalg‘itib yuborganini aytadi. Har bir murabbiy uni boshqacha ishlatdi, bu esa barqarorlikka putur yetkazdi.
Shu yerda yana Emery nomi tilga olinadi. Morgan Rogers va Ollie Watkins’ning Aston Villa tarkibida boshqa darajaga ko‘tarilgani – ko‘z o‘ngimizda bo‘lib o‘tgan jarayon. Begovicning fikricha, Leao ham Emery qo‘lida asosiy yulduz maqomiga chiqsa, bu uning karerasidagi burilish nuqtasiga aylanishi mumkin.
Soat ishlayapti, bozor qaynayapti
1-sentabr yaqinlashmoqda. Aston Villa esa bir vaqtning o‘zida ikkita frontda kurashmoqda: bir tomondan, Watkins atrofidagi noaniqlikni hal qilish, ikkinchi tomondan, Leao bo‘yicha Milan bilan og‘ir muzokaralar olib borish.
Savol aniq: Villa yangi davrni yoqadimi yoki yozgi bozorni yana bir bor yo‘qotilgan imkoniyat sifatida eslab qoladimi?
