Arsenal yangi mavsumda chempionlikni qo‘lga kiritmoqchi
“Emirates”ga yo‘l olayotganlar endi bu klubni boshqacha ko‘radi. Stadion kirish qismida yaltirab turgan yangi yozuv hammasini aytib turibdi: oltin harflar bilan bitilgan bitta so‘z – “Champions”.
Bu shunchaki dekor emas. Bu – o‘tgan mavsumgi 22 yillik tanaffusdan keyingi Premyer-liga chempionligi ortidan kelgan o‘ziga ishonchning ramzi. O‘yinchilarda ham, tribunadagi minglab muxlislarda ham endi boshqa kayfiyat bor. Ular chempionlikni nishonlab bo‘lishmadi, endi uni himoya qilish emas, yana tortib olish uchun maydonga tushishmoqda.
“Biz hech narsani himoya qilmayapmiz”
“Arsenal” futbolchilari maydonga mashg‘ulotga chiqayotganda har biri alohida tanishtirildi. Tribunalar esa “champions of England” qo‘shig‘ini 3:0 hisobidagi “Coventry” ustidan g‘alaba davomida bir zum ham to‘xtatmadi. Bu shunchaki birinchi tur emasdi, bu – yangi yurishning boshlanishi edi.
Kaptan Martin Odegaard o‘yinoldi dasturida ham, keyin “Match of the Day”ga bergan intervyusida ham bitta fikrni qayta-qayta urg‘uladi: bu jamoa chempionlikni himoya qilish uchun emas, uni yana qo‘lga kiritish uchun harakat qilmoqda.
“Biz hech narsani himoya qilishimiz kerakdek his qilmadik. Biz buni yana qilishni xohlaymiz – mana shunday kayfiyat,” – dedi u. – “O‘tgan yil tugadi. Biz yana xohlaymiz, yana hujum qilamiz, yana kurashamiz”.
Bu so‘zlar bo‘sh shior emasligini “Coventry”ga qarshi uchrashuvning ilk daqiqalaridayoq ko‘rish mumkin edi.
Arteta o‘zgargan klub va 150-g‘alaba
Yangi ko‘tarilgan jamoaga qarshi birinchi turdan o‘ynash – “Arsenal” uchun achchiq xotirani eslatadi. 2021-yil, ochilish turi, safarda “Brentford”ga mag‘lubiyat. O‘sha kecha Arteta uchun og‘ir saboq bo‘lgandi.
Bugun esa manzara mutlaqo boshqacha. “Coventry” ustidan ishonchli g‘alaba bilan Arteta Premyer-ligada 250 ta o‘yindan kamroq muddatda 150 ta g‘alabaga erishgan atigi beshinchi murabbiyga aylandi. Uning yonida faqat Pep Guardiola, Jose Mourinho, Jurgen Klopp va Sir Alex Ferguson kabi gigantlar turibdi. Bu ro‘yxatning o‘ziyoq “Arsenal”ning yo‘lini ko‘rsatib turibdi.
Arteta klubni faqat taktika bilan emas, stadion ruhi bilan ham o‘zgartirishga bel bog‘lagan. “Emirates”ni raqiblar qo‘rqadigan qal’aga aylantirish – uning obsesiyasi. O‘tgan mavsumda ko‘p marotaba “Arsenal” muxlislari asabiy energiyasi uchun tanqid qilindi, bu taranglik maydonga ham tushib, chempionlik poygasida jamoaga og‘ir bosim bo‘lib borgan edi.
Bu safar esa boshqa manzara. “Coventry”ga qarshi o‘yinda tribunada na vahima, na shoshqaloqlik sezildi.
Arteta o‘yin tugagach, BBC Sportga bergan fikrida ehtiyotkor optimizmni tanladi: “Keling, 0:0 bo‘lganda yoki mag‘lub bo‘layotganimizda qanday reaksiya bo‘lishini ko‘raylik. Bugun o‘yin boshidayoq ikki gol oldik, bu hammaga shunday kayfiyatga kirish uchun platforma bo‘ldi. Lekin o‘tmishdan hammasini o‘rgandik – tribunadagi qo‘llab-quvvatlash jamoaga naqadar yordam berishini bilamiz. Bunday atmosferada futbol o‘ynash – zavq”.
Asosiy uchlik qaytdi – va hukmronlik qildi
O‘tgan mavsumdagi asabiylikka sabablar ko‘p edi: asosiy futbolchilarning jarohatlari, uslub bo‘yicha tanqidlar, tarkibdagi majburiy o‘zgarishlar. Eng qiziq faktlardan biri – bugun gol urgan uchlik: Kai Havertz, Martin Odegaard va Bukayo Saka o‘tgan mavsumda Premyer-ligada birga asosiy tarkibda atigi bir marta maydonga tushgan.
“Coventry”ga qarshi esa ularning uchtalasi ham birgalikda startda edi – va “Arsenal” o‘zining eng hukmron futbolini namoyish qildi. 23-daqiqaga kelib hisob 2:0. Bu – 2023-yildan beri “Arsenal”ning raqibni shuncha tez ikki to‘p farqiga olib chiqqan ilk holati, o‘sha paytdagi raqib “Wolves” bo‘lgan.
O‘tgan mavsum jarohatlar bilan qiynalgan Odegaard endi yana o‘zining eng yaxshi formasiga qaytganini isbotlamoqda. “Community Shield”da “Manchester City”ga qarshi “match of the player” darajasidagi o‘yindan so‘ng, u yana maydon markazida hammasini boshqargan futbol namoyish etdi. U o‘tgan mavsum 36 o‘yinda atigi bitta gol urgandi. Endi esa – allaqachon undan ko‘p gol. Mavsum endi boshlanayotganini hisobga olsak, bu juda kuchli signal.
Tzolis – yangi qurol
Yozgi transfer oynasida “Arsenal” hujumni kuchaytirish uchun elit darajadagi hujumchi izlayotgani haqida ko‘p yozildi. Lekin bir transfer allaqachon tribunalarni hayajonga solib ulgurgan: Christos Tzolis.
£34 million evaziga “Club Brugge”dan kelgan yunon vinger o‘tgan mavsum Belgiya chempionligida 17 gol va 23 golli uzatma bilan karerasidagi eng yaxshi yilini o‘tkazdi. Londonga kelgach, u hali rasmiy o‘yinlar boshlanmasidanoq muxlislarni o‘ziga rom qildi: mavsumoldi uchrashuvlar, “Community Shield”da “Manchester City”ga qarshi ikki golli uzatma – bularning bari uni “Emirates”da tezda sevimliga aylantirdi.
“Coventry”ga qarshi ham aynan uning krossi Saka uchun ikkinchi golga zamin yaratdi. Premyer-ligadagi debyutida Tzolis nafaqat raqamlar, balki o‘yin sur’ati, qaror qabul qilish tezligi bilan ham ko‘zga tashlandi.
Odegaard ham uni alohida ta’kidladi: “Ajoyib, u zo‘r o‘yin o‘tkazdi. Butun pre-sezonda juda yaxshi edi. Juda jonli. Unga qarshi himoyalanish qiyin. U juda aqlli futbolchi, doim boshini ko‘tarib yuradi va to‘g‘ri pasni topadi”.
Arteta esa undan ham keskinroq baho berdi: “Menga yoqadigani – biz bilan atigi bir necha hafta bo‘lgan futbolchi har safar to‘pga tegsa, stadiondan shunday energiya oladi. U bunga munosib. So‘nggi o‘yinlardagi o‘yini fenomenal. U juda bevosita, juda keskin, doim nimanidir yaratmoqchi bo‘ladi. Oxirgi 30 metrda u juda ko‘p variantga ega. Endi hammasi uning qarorlariga bog‘liq. Ba’zan bo‘shliqlar juda kichik bo‘ladi, lekin u to‘g‘ri tanlov qilmoqda. Men undan juda mamnunman”.
Chempionning birinchi qadami
Bu 3:0 hisobidagi g‘alaba “Arsenal” mavsumini belgilab bermaydi. Ammo bir narsani aniq ko‘rsatdi: bu jamoa o‘tgan yilgi chempionlikni tasodif deb bilmaydi va uni ortda qoldirib, navbatdagisiga yurish boshlagan.
Stadion peshtoqlaridagi “Champions” yozuvi hozircha o‘tgan mavsum xotirasi. Savol bitta: bu yozuv bir yil o‘tib ham o‘sha oltin rangda, o‘sha mag‘rur ohangda tura oladimi?
