Arsenal Guimaraes transferida harakatda: Newcastle reja “B”ni ishga tushirdi
Arsenal yozgi transfer oynasini baland notada ochishga bel bog‘lagan. Maqsad aniq: Newcastle markazidagi yurak – Bruno Guimaraes.
Londondan yuborilgan ilk rasmiy taklif dushanba kuni rad etildi. Bu esa muzokaralarning tugaganini emas, endigina qiziy boshlaganini anglatadi. Klub manbalariga ko‘ra, Guimaraes allaqachon Ispaniyadagi mavsumoldi yig‘inida jamoadoshlari bilan birga bo‘lsa-da, ichida boshqa manzilni ko‘rib turibdi – Emirates.
Standart Sport ma’lumotlariga qaraganda, braziliyalik yarim himoyachi Arsenalga o‘tish istagini bildirgan. Ayrim xabarlarda esa u bilan besh yillik shaxsiy shartnoma bo‘yicha kelishuv allaqachon erishilgani yozildi. Hali hech narsa imzolanmagan, ammo yo‘l chizig‘i ko‘rinib turibdi.
Kutilayotgan savol bitta: kelishuv qachon yakunlanadi?
Newcastle reja “B”ni ishga tushirdi
Shartnoma bo‘yicha muzokaralar davom etar ekan, shimol klubi bekor o‘tirgani yo‘q. Guimaraes o‘rnini bosadigan nom allaqachon aniqlangani haqida xabarlar paydo bo‘ldi. Bu esa Arsenal uchun yaxshi signal – Newcastle o‘rnini to‘ldirish rejasisiz asosiy yulduzini qo‘yib yubormaydi.
Portugaliyadan kelayotgan xabarlarga ko‘ra, Newcastle endi Porto markazidagi asosiy dvigatel – Victor Froholdt bilan jiddiy shug‘ullana boshladi. O Jogo yozishicha, ingliz klubi allaqachon daniyalik futbolchining vakillari bilan aloqa o‘rnatgan va ehtimoliy transfer shartlarini muhokama qilmoqda.
Bu oddiy “qiziqish bildirish” emas, konkret qadam. O‘tgan 12 oy ichida bir necha bor nishonlari tomonidan ochiqchasiga rad etilgan Newcastle bu safar avval o‘yinchining kayfiyatini o‘lchamoqda. Aqlli yondashuv. Lekin oson bo‘lmaydi.
Froholdt – mukofotlar, klauzula va qat’iy pozitsiya
Froholdt yaqinda Primeira Liga mavsumining eng yaxshi futbolchisi deb topildi. Bunday mukofot o‘z-o‘zidan kelmaydi. U Porto o‘yinini boshqarib, chempionlik poygasida jamoaning asosiy tayanchlaridan biriga aylandi.
Shu fon’da daniyalik futbolchining transfer bozoridagi narxi ham, talabgorlar soni ham oshgani tabiiy. Lekin bitta to‘siq bor – shartnomasidagi 73,4 million funtlik tovon puli. Bunday raqam har qanday muzokarani murakkablashtiradi.
Porto hozircha Newcastle’dan rasmiy taklif olgani yo‘q. Gap faqat aloqa va zamin hozirlash darajasida. Bundan tashqari, Froholdtning o‘zi ham omma oldida pozitsiyasini aniq aytgan: u hozircha Porto bilan baxtiyor.
“Keyngi qadam haqida gapirishadi, lekin men uchun Porto allaqachon ulkan klub”, – degandi u yaqinda. “Men keyngi liga uchrashuviga e’tibor qaratganman. Bu yerda bo‘lish menga yoqadi. Endi chempionlik uchun bor kuchimizni sarflaymiz”.
Bu so‘zlar Newcastle uchun sovuq dushdek tuyulishi mumkin. Lekin transfer bozorida kayfiyat tez o‘zgaradi. Ayniqsa, katta pul va katta loyihalar ishga tushganda.
Arsenal uchun oyning ochilishi
Guimaraes atrofidagi vaziyat esa tobora Arsenal foydasiga og‘ayotgandek. Futbolchining o‘zi London sari intilayotgani, shaxsiy shartlar bo‘yicha muammo yo‘qligi haqida xabarlar – bu Mikel Arteta loyihasining jozibasidan dalolat.
Endi eng muhim qism – klubdan klubga kelishuv. Newcastle o‘zining asosiy yulduzlaridan birini yo‘qotish arafasida turibdi, lekin Froholdt nomi atrofidagi harakatlar ular bu yo‘qotishni boshqariladigan jarayonga aylantirishga urinayotganini ko‘rsatadi.
Guimaraes uchun kurashda Arsenal qanchaga boradi? Newcastle Froholdt bo‘yicha qanchalik tez harakatlana oladi? Va eng muhimi – Porto o‘zining mavsum futbolchisini 73,4 million funtlik klauzulaga yaqin raqam bo‘lmasa, qo‘yib yuboradimi?
Yozgi oynaning dastlabki kunlaridayoq bu savollar atrofida keskin pozitsiya olishga to‘g‘ri keladi. Chunki bir narsa aniq: Guimaraes kelajagi hal bo‘lgach, bozorning keyingi katta to‘lqini aynan shu transfer ortidan keladi.
