15 yoshli JJ Gabriel: Manchesterdan chiqib ketayotgan superiste’dod
Evropadagi eng ko‘p tilga olinayotgan yosh iste’dodlardan biri — 15 yoshli JJ Gabriel atrofidagi shov-shuv endi yangi bosqichga chiqdi. “Manchester United” tarbiyalanuvchisi bo‘lgan bu yigit allaqachon yirik klublarning e’tibor markazida, lekin u o‘z yo‘lini aniq belgilab bo‘ldi: “Old Trafford”da qolmaydi.
“Manchester United” bilan 16 yoshdan keyin shartnoma bo‘lmaydi
Klub ichidagi bir qator bahsli vaziyatlardan so‘ng, Gabriel tomoni pozitsiyasini keskin ravishda aniqlashtirdi. Uning oilasi va agenti Ali Barat orqali “Manchester United” rahbariyatiga ochiq xabar yetkazildi: 16 yoshga to‘lgach, yangi shartnoma bo‘lmaydi.
Bu qaror vaqtinchalik kayfiyat emas, qat’iy tanlov sifatida qabul qilinmoqda. “Manchester United” allaqachon bu holatni ichkarida tan olib bo‘lgan: klub bir necha bor turli takliflar bilan chiqqan, lekin Gabriel lageri pozitsiyasini o‘zgartirmadi.
So‘nggi kunlarda futbolchi jamoa bilan ayrim majburiyatlaridan ham chekinmoqda. Sabab bitta — kelajak manzilini aniqlashga butunlay e’tibor qaratilmoqda.
Katta poyga: Barcelona, Real Madrid, Bayern, PSG
Gabrielning “Manchester United”ni tark etish qarori bozorni junbushga keltirdi. Endi bu faqatgina iste’dodli o‘smirni qo‘lga kiritish emas, balki kelajak yulduz ustidan strategik kurashga aylangan.
Oila Premyer-liga doirasidan tashqariga chiqishga qaror qilgach, nomzodlar soni keskin qisqardi. Moliyaviy qudrati va sport infratuzilmasi yetarli bo‘lgan oz sonli elita klublar maydonda qoldi.
Natijada hal qiluvchi poyga to‘rt klub orasida: Bayern Munich, Paris Saint-Germain, Real Madrid va Barcelona.
Gabriel va uning oilasi bu jamoalarning vakillari bilan allaqachon uchrashib ulgurgan. Barcelona safari o‘tgan hafta ochiqcha yoritildi, oilaning Madridga qilgan tashrifi ham yashirin qolmadi. Qisqasi, bozor ortidagi asosiy suhbatlar allaqachon boshlangan.
Gabrielga yaqin manbalar bir muhim xulosani ta’kidlaydi: ular uchun eng maqbul yo‘nalish — La Liga.
Ularning fikricha, aynan Ispaniya chempionati Gabriel iste’dodini bosqichma-bosqich ochib borish uchun eng to‘g‘ri muhit. Barcelona va Real Madrid esa eng yuqori darajaga ko‘tarilish uchun tayyor platforma sifatida ko‘rilmoqda.
Bu La Liga’ga bo‘lgan ustuvorlik yakuniy qaror degani emas. Bayern yoki PSG tomonidan tushadigan juda kuchli, sport va moliyaviy jihatdan jozibador taklif muzokaralarga ta’sir o‘tkazishi mumkin. Lekin hozircha asosiy kurash tobora ikki ispan gigantiga qarab torayib bormoqda.
Barcelona’ga alohida mehr
Gabriel atrofidagilar bir haqiqatni yashirmaydi: yigitning o‘zida Barcelona’ga nisbatan alohida simpatiya bor.
U ijtimoiy tarmoqlarda bir necha bor Barcelona ranglaridagi kiyimlarda, to‘p bilan o‘z mahoratini namoyish etayotgan videolar bilan ko‘ringan. Bu tasodif emas, bolalikdagi orzular va futbol didining tabiiy ifodasi sifatida talqin qilinmoqda.
Shu bilan birga, Real Madrid ham uning radari ichida. Gabriel klubning rasmiy sahifalarini, ayrim futbolchilarini kuzatib boradi, bu esa Madrid variantini ham jiddiy stolda ushlab turibdi.
Hozircha hech narsa yopilgan emas. Muzokaralar ochiq, pozitsiyalar harakatda.
Barcelona Gabrielning shaxsiy istagi ularning foydasiga ishlashi mumkinligini juda yaxshi tushunadi. Ammo Kataloniya klubi bir narsani ham unutmayapti: agar Real Madrid bu transferga to‘liq kuch bilan kirishsa, moliyaviy tomondan ancha agressiv taklif berish imkoniyatiga ega.
Aynan shu ehtimol allaqachon keskin bo‘lgan poygaga yana bir qatlam qo‘shadi. Bir tomonda moliyaviy qudrat, boshqa tomonda esa futbol falsafasi va bolalikdan shakllangan simpatiya. Endi savol bitta: JJ Gabriel qaysi yo‘lni tanlaydi — orzusining ranglarini yoki eng katta chekni?
